Data: 28 Dhjetor 1986
Subjekti: Djaloshi me syze dielli dhe dëshirë për dalje jashtë
“Shoku Kryetar i Degës së Brendshme,
Më falni për shqetësimin, por më duhet të raportoj për një fenomen që më ka tronditur thellë shpirtërisht. Djaloshi i katit të tretë, emri i të cilit nuk po e përmend për arsye sigurie (por e kam shkruar në letër të veçantë në zarfin tjetër), është dëgjuar duke thënë se dëshira e tij më e madhe është të dalë jashtë shtetit për të bërë… SELFIE!*
Po, shoku Kryetar, ky element dekadent dëshiron të largohet jo për arsye politike, jo për arratisje klasike me not apo bunker në kurriz, por thjesht për të bërë foto me fytyrën e vet (Selfie) përballë Kullës Eiffel dhe për t’i hedhur në një rrjet misterioz që do lancohet vite më vonë dhe do te quhet “Instagram”, një lloj gazetë pa Partinë që e lexojnë të gjithë, por ku nuk shkruan askush për Thirrjen e Kongresit të Shtatë.
Ky mentalitet më tremb. Nëse nuk ndërhyjmë sot, në të ardhmen shqiptarët do të ikin jo për të shpëtuar, por për t’u kthyer mbrapsht me një valixhe me dhurata dhe një caption poshtë fotos që thotë “Life is beautiful” – pa përmendur as luftën e klasave, as shokun Enver, as plenumet!
Në vend të fletë-rrufeve, do të bëjnë “story”. Në vend të autokritikës, do të përdorin “filtra”. Dhe në vend të fjalës së Partisë, do të ndjekin njëfarë “influencer-i” që s’ka lexuar kurrë “Materializmin Dialektik”!
*Propozoj:
Hetim të plotë për këtë të ri.
Konfiskim të telefonit që ka më shumë butona se radioja e Komitetit.
Edukim me punë – preferueshëm në minierën e Valiasit.*
Në mbrojtje të realitetit socialist,
Nexhmedin Vështrimi
