Shoku Kryetar,
Sot, gjatë patrullës time vullnetare në rrugën “8 Nëntori”, pashë dy gra të lagjes që ecnin me hap aq të shpejtë, sa dukej sikur ndiqnin trenin e fundit për në Perëndim. Hapat e tyre nuk prekën trotuarin – ata fluturonin si sekretaret borgjeze të filmave imperialistë, të cilat me çdo hap sjellin aromë rreziku.
Kjo ecje e shpejtë, që i ngjan një marshi kontrarevolucionar, tregon se ose mbajnë në çantë ndonjë plan arratisjeje, ose po stërvitin muskujt për të kapërcyer kufirin.
Nëse ky fenomen vazhdon, kam frikë se në të ardhmen gratë nuk do të vrapojnë më pas bidonit të qumështit në agim, por do të vrapojnë në maratona të huaja në New York, me atlete që kanë tre viza si tre plagë të Partisë, dhe pastaj do të bëjnë foto që i ngjisin në një mur virtual, të quajtur “Facebook” – ndoshta ndonjë kishë e re borgjeze, ku besimtarët luten me “like”.
Propozoj: Të kontrollohet ritmi i ecjes, të ndalohet frymëmarrja e shpejtë në publik dhe të kufizohen atletet që kanë ngjyra më të gjalla se flamuri ynë i kuq.
Me hap të ngadaltë dhe sy vigjilent,
Kol Shkarravina
